اروح كوكب الارض منين ؟؟؟

يا انهار ابيض

ايه الناس دى كلها اكيد مش كلهم طلبه يمكن الطلبه الجداد جايبين قرايبهم معاهم

مهو اول يوم بقه او يمكن الناس اللى مدخلوش الجامعه جايين يتفرجوا علينا ويتحسروا على نفسهم
بكل الاطه

بقلك ايه يا اروح مدرج.....
امش مع الى مشيين دول ومتوجعش دماغنا
ايه ده الراجل ده بيكلمنى كده ليه
اه اكيد ميعرفش ان انا طالب فى الجامعه
نفسى اشوفه لو عرف ان انا جامعى يمكن يموت من الغيظ
طيب والله فكره لما اروح اعرفه
بقلك ايه الكارنيه ده ادخل بيه منين؟
يووو مش قلت لك روح مع الى رايحين

انت جى تقرفنا من اول يوم ولا ايه
ايه ده يا راجل انت انت بتكلمنى كده ليه انت متعرفش انا مين ولا ايه انا طالب جامعى عارف يعنى ايه؟
ههههههههههههه يعنى ايه طالب جامعى ده انتوا يا ابنى زى الهم على القلب وزى ما هتاخد فى الكليه ان الحاجه لما يزيد العرض عليها يقل سعرها وغور بقه من قدامى ده انت قلبت دماغى
اكيد الراجل ده مقدرش يدخل الجامعه ومبقاش محترم زى ما بابا قلى وجى النهارده علشان يحقد على الطلبه
المدرج اهه

يا انهار ابيض ايه كل دول؟ ده مفيش مكان

يعنى انا هاقعد فين ؟

اه فيه مكان فاضى هناك اهه من فضلك اتاخر شويه علشان اقعد
مفيش مكان دورلك على حته تانيه
مهو المكان جنبك اه مفيش مكان ازاى
ده محجوز واتكل ياله من هنا
يعنى ايه محجوز هيا سينما
بقلك ايه مش هتقعد يعنى مش هتقعد
ايه ده هو انت بتلعب حديد طيب انا اسف خلاص اقعد انت لوحدك
مين ده عامل المدرج دخل ومسك المكرفون:

كله يقعد مكانه

انت يا طالب متقفش كده اقعد مكانك
انا؟
ايوه انت
هو الراجل ده ما بيشوفش ولا ايه؟

انت شايف فى مكان فاضى وانا مقعدتش؟
اقعد مكانك على الارض
اقعد على الارض اللى بندوس عليها
ازاى ده البدله تتوسخ
ابقه سيبها فى البيت يا خويه
انا مش هقعد ولو مسكتش هسيب المدرج واخرج

ههههه ما فى ستين.....
وخد عشره معاك وتبقى عملت فينا جميله
ولو مقعدتش انا اللى هاجى اطردك بره
امرى لله ادينى قعدت بس من فضلك سكتهم بقه علشان اعرف اسمع الدكتور
لو تعرف انته سكتهم يا خويا يا ما تسكت وتبطل لماضه