اروح كوكب الارض منين ؟؟؟

( الفلاح الرابع ) السيد سرحان الندمان

طيب يا افتدى لمؤاخذه كده إنا سمعت في التلفزيون بيقولوا أنهم خايفين من موضوع اسمه ؟ اسمه ؟

ايوه اسمه ( سيناريو التوريث )وبيقولوا إن دى حاجة مضره بصحة الفلاح

يعنى تكون حاجة زى البلهارسيا كده يا بيه ؟؟؟

هههههه ...يا جماعه للأسف شعبنا طيب وعلى نياته و بيصدق كل اللي الناس الوحشة دى بيقولوه له ...لا يا سيدي دى مش بلهارسيا ولا حاجة كلمة سيناريو دى كلمه محرفه وأصلها

( سينالكوا التوريث )

وتنقسم إلى 3 مقاطع :

1- (سينا )اللي هيا سينا بتاعة أكتوبر يعنى

2- (لكوا) اللي هما انتوا يعنى

3- (التوريث )اللي هو الورث يعنى

يعنى إحنا هنسبب لكم سينا ونكتبها لكم

زى ورث لكوا كده

شفت يا سيدي الناس الوحشة دى

مش عايزه مصلحتكوا ؟؟

ثم صاح حلاوة : شفت أد إيه مش عايزين

(سيناكوا التوريث) ؟؟؟

لم يتمالك الفكهانى نفسه وصاح قائلا :

ولآد الكلب بقه هو ده اللي مش عجبهم ؟؟

ثم التفت إلى الفلاحين وقال :

طيب قولوا ورايا يا رجاله ( يعيش سيناكوا التوريث )

وقبل إن يردد الفلاحين الهتاف

قاطعهم حلاوة قائلا :

معلش يا حاج بس باريت تهتفوا بالكلمة محرفه زى ما بينطقوها

يعنى!! خاطبوا الناس على قدر عقولهم

وكمان عشان تعرفوهم انكوا فاهمين ألاعيبهم

ايوه صحيح والله عندك حق يا سى الافندى

قولوا ورايا يا رجاله يعيش سيناريو التوريث

الجميع ( يعيش سيناريو التوريث يعيش سيناريو التوريث)

مبروك عليك يا حلاوة

سؤال الحلقة ( أذكر مرادف كلمة (حلاوة )باللغة العربية الفصحى ومعنى كلمة (ميمون) ثم ضعهم مع بعض في جمله وحيدة ؟؟؟

لو عرفت الاجابه خليها في سرك لان الجايزه مش هتعجبك