يوميات محاسب فى السعودية ( الجزء الثانى )فى كلية الفنون الجميلة

(أول يـــــــــــوم فـــــي الكليــــة)

( يتقدم السيد المحاسب نسر الشرق باتجاه احد طلبة الفنون الجميلة والذي يقف إمام تمثال للنحات محمود مختار متأملا فيها )

لو سمحت أنت يا أستاذ؟؟ أنت يا افتدى؟؟ أنت يا ندل أنت ؟؟؟

هش هش هش هش

هو حضرتك واقف قدام التمثال ده وساكت قوى كده ليه ؟؟؟ هو أنت اسمك إيه؟ ( ابولهب )؟

ابولهب إيه يا ابو جهل أنت ؟؟؟؟ أنت مش شايف التحفة المعمارية اللي قدامك ؟؟

دى من أعظم أعمال الفنان محمود مختار

اه اه اه طيب ممكن أسألك سؤال ؟ هو محمود مختار ده فى سنه كام ؟؟

سنة كام ايه يا متخلف أنت ؟؟؟ أنت عاوز ايه بالضبط ؟؟ وإيه اللي دخلك هنا ؟؟؟

يا امن .... يا أمن الكلية

أمن الكلية ؟؟ أنت مش عارف إنا مين ولا إيه ؟؟؟

أنا طالب هنا ولسه أول يوم ليه في الكلية تقوموا تطلبولى الأمن ؟؟؟

بقه هو ده كرم الضيافة ؟؟ هى دى شهامة ولاد البلد ؟؟؟

كرم إيه وضيافة إيه ؟؟؟ أنت طالب هنا ؟؟ معقولة دى ؟

الله يرحمك يا أستاذ محمود مختار الكلية لمت خلاص

إيه هو مات ؟؟؟ اه اه عشان كده أنت زعلان أوى ؟ واضح أنى جيت في وقت مش مناسب

أنا أسف والله أنا لو عارف إن عندكم ميتم النهارده مكنتش جيت وأجلت الكلية لبكرة

وعلى العموم البقية في حياتك ومنجلكش في حاجة حلوه قصدي حاجة حادقه

أنت عاو ز إيه دلوقتى ؟؟؟

آه ممكن لو سمحت خدمه ( أنا بس عايز افرح أبويه و امى بالكلية بتاعتى)

إنا هطلع اركب فوق التمثال ده وافتح أديه مروحة وأنت تمسك الموبايل بتاعى

وتصورني وأنا راكب على التمثال

راكب على تمثال إيه؟؟؟ أنت أكيد مجنون . غور من قدامى قبل ما اطلبلك مستشفى المجانين

إنا عارف بيبعتولنا البلاوى دى منين؟؟ امشي ياله

أعوذ بالله الراجل ده بيزعقلى كده ليه؟ كل ده عشان قولت له هركب على التمثال ؟؟

آمال لو قولت له هركب على الحمار كان عمل إيه ؟؟

انتى يابت ...انتى نايمه كده ليه ؟ اتعــــدلى .....

وأنت ياد أنت واقف ترسم فيها وهى نايمه كده ؟؟ كده عيب

لا لآلا لا لألا لا إحنا متفقناش على كده سلام باى باى إنا هحول من الكلية دى